Craig Coley, 70 vjeç nga Los Angeles, u lirua nga burgu pas thuajse 40 vitesh, pasi një gjykatë vendosi se ai ishte burgosur gabimisht. Një histori vërtet dramatike kjo, pasi Coley kaloi në burg pjesën më të rëndësishme të jetës së tij.
Ai e kaloi më shumë se gjysmën e jetës pas hekurave i akuzuar dhe dënuar për vrasjen e partneres dhe djalit të tij.
Lirinë, megjithëse tej mase të vonuar, ia kushton një detektivi që besoi në pafajësinë e tij. Në vitin 1978, Coley u ndalua pasi partnerja e tij Rhonda Wicht, 24 vjeç, dhe djali i tyre Donald, 4 vjeç, u gjetën të vrarë në shtëpi.
Craig Coley, në atë kohë 31 vjeç, ishte i dyshuari kryesor dhe pavarësisht një gjyqi të parë të pasuksesshëm, Prokuroria pati sukses në përpjekjen e dytë dhe ai u dënua me burgim të përjetshëm.
11 vite më vonë, në vitin 1989, detektivi Mike Bender hapi rastësisht dosjen e Craig Coley dhe që në faqet e para kuptoi se shumë gjëra nuk shkonin. Pas një hetimi intensiv, Bender u bind se Coley ishte i pafajshëm dhe nisi betejën shumëvjeçare me autoritetet për të rihapur çështjen.
Kjo u bë e mundur vetëm në vitin 2015, pasi ish-policë treguan se që prej asaj kohe besonin se Coley nuk ishte fajtor. Hetimi i ri tregoi pa as më të voglin dyshim se, ADN-ja e Coley, e cila ishte përdorur si provë dërrmuese dekada më parë, as që ekzistonte mes provave.
Gjykatësi urdhëroi me shpejtësi lirimin e Coley, i cili doli nga burgu në kohë për Ditën e Falenderimeve, që e kaloi në shtëpinë e mikut të tij më të mirë, detektivit Mike Bender.
(E.K/FAXWEB)
Discussion about this post