“Ishte i shkëlqyer”, Baroni “përkëdhel” Hysajn, Conte: Jemi të tërbuar

Me Hysaj titullar, dhe me një super Noslin, Lazio siguroi një biletë për në fazën çerekfinale të Kupës së Italisë, kaluan Napolin me rezultatin 3-1 duke dominuar me lojë dhe rezultat. Trajneri i Lazio-s, Marco Baroni, nuk e fshehu gëzimin për këtë kualifikim, por fillimisht u ndal duke i bërë elozhe anësorit kuqezi, Elsid Hysaj:

“Hysaj bëri një lojë të shkëlqyer. Ai djalë nuk ishte në listë, por gjithmonë na ka dhënë një dorë. Ndaj Napolit doja ta shpërbleja dhe ai u përgjigj shumë mirë në fushë. E përsëris, ajo që na interesonte ishte kalimi në raundin tjetër dhe e bëmë gjithashtu me një lojë të mirë”, u shpreh Baroni.

Nuk e fshehu zhgënjimin për këtë eliminim Antonio Conte i cili pagoi shtrenjtë rotacionin e kryer: “Zhgënjimi është prezent për faktin që dolëm nga një kompeticion, jemi të tërbuar. Ne e dinim se zgjedhja për të bërë këtë rotacion do të kishte kosto, do të ishte e rrezikshme, por në të njëjtën kohë duhet të aktivizonim lojtarët që kanë pasur më pak minuta për të bërë disa vlerësime”, u shpreh Conte.