Ish-ministri i Drejtësisë, Ylli Manjani ka reaguar ndaj deklaratave të Edi Ramës, që ky i fundit bëri në një intervistë në emisionin ‘FAKT’ të gazetarit Çim Peka në SYRI.net.
Rama tha se ministri më i keq i tij, kishte qenë Manjani, duke shtuar se ai nuk kishte të bënte fare me postin e tij. Pas këtyre deklaratave të Ramës ka reaguar për SYRI.net edhe vetë Manjani. Manjani ka theksuar se kryeministri do ta bëjë personale me të dhe ai tregon se po të dojë ia fillojmë nga të dojë Rama.
“1. Pa dyshim që nuk isha ministri i duhur për qeverinë e hashashit. Në këtë pikë jam dakord me kryeministrin. Ai vetëm te droga dhe tek koncesionet e kishte mendjen, ndërsa unë tek ligjshmëria e qeverisë. Pra dallim shumë i madh.
2. Pa dyshim që nuk kisha asnjë iluzion se Edi Rama kishte ndryshuar nga sa e njoha në PS. Por edhe unë vendosa t’i jap vetes një shans që të kontribuoj nga brenda dhe jo vetëm duke kritikuar nga jashtë! Shans të cilin e shfrytëzova sepse e pashë me sytë e mi shkeljen e ligjit në pushtet!
3. Sa për shansin që më paska dhënë ai, ja fut kot sigurisht! zgjedhja ime aty ishte vendim i Ilir Metës dhe e LSIdhe jo i Edi Ramës! Ky i fundit vetëm firmosi letrën për në presidencë. E kundërta është e vërtetë, futja ime në kabinet madje edhe dalja nga kabineti ishte për ti dhënë shans qeverisë së koalicionit, të cilën siç edhe e pamë e shkatërroi vetë rama!
4. Së fundi të gjithë ministrat e LSI kanë shprehur rezerva të thella për qeverinë dhe vendimmarrjen e saj. Në disa raste prej tyre, ka edhe deklarata publike shumë më të forta se qëndrimet e mia parimore. Kryeministri do ta bëjë personale me mua. Është i mirëseardhur! Ja fillojmë nga ta dojë ai…”, u shpreh Manjani për Syri.net. (J.V/Shuplaka)
Discussion about this post