Policia e Tiranës në bashkëpunim me Interpol Tirana kanë arrestuar Manjola Priftin, ish-bashkëshorten e Fatmir Ramës, i njohur si Miri i Xhikes.
Ajo akuzohet për pjesëmarrje në organizata kriminale dhe ishte shpallur në kërkim ndërkombëtar, pasi ishte dënuar nga gjykata italiane me 7 vite e 3 muaj burg.
Fatmir Rama, i njohur si Miri i Xhikës u ekzekutua në ambientet e kompleksit të tij “Kartodromi” në Lundër, 9 vjet më pare.
NJOFTIMI I POLICISE
Policia e Tiranës në bashkëpunim me Interpol Tirana kanë bërë arrestimin provizor me qëllim ekstradimi të shtetases:
Manjola Prifti, 43 vjeç, banuese në Tiranë.
Kjo shtetase ishte e shpallur në kërkim ndërkombëtar pasi:
Autoritetet Gjyqësore Italiane, e kanë dënuar shtetasen Manjola Prifti me 7 vjet, 3 muaj dhe 15 ditë burg, për veprën penale “Pjesëmarrje në organizatë kriminale, me qëllim trafikimin e lëndëve narkotike” bazuar në nenin 110 të Kodit Penal Italian dhe Neni 73 e 74 të Dekretit të Presidentit Italian nr. 309/90. Materialet u referuan në Prokurorinë pranë Gjykatës së Shkallës së Parë Tiranë. (B.H/Faxweb)
