Drejtori i informacionit në “News24”, Robert Rakipllari, kujtoi mes dhimbjes punën për plot një dekadë me Presidentin e “Fax News”, Kasem Hysenbelliu, i cili u nda nga jeta ditën e sotme, pas betejës me koronavirusin.
I ftuar në Fax News Rakipllari u shpreh se ndarja nga jeta e presidentit Kasem Hysenbelliu është e pabesueshme për të gjithë bashkëpunëtorët e tij.
“Rrugëtimin tim me zotin Hysenbelliu e kam nisur në vitin 2006, në grupin Panorama ku ai ishte administratori, kam bashkëpunuar me të deri në vitin 2012. Është e pabesueshme që jemi sot këtu dhe të flasim për Kasemin, veçanërisht për çështjet e medias, të cilat ai i kishte me merak.
Marrëdhënia ime me Kasemin ka qenë në rrafshin profesional dhe miqësor, ishte një njeri jashtëzakonisht pozitiv dhe kurajoz, por ishte një njeri me veti humane dhe njerëzore. Nga pikëpamja profesionale ai ishte njeriu që ishte gjithnjë në krahun e gazetarëve, nuk ishte drejtuesi klasik, i akullt që jepte urdhëra, raportet me të ishina to mes kolegësh.
Ka një kontribut të madh që gazeta Panorama u bë gazeta më e lexueshme në treg, ashtu si dhe puna e tij në televizionin neës 24. U jepte gazetarëve mundësinë për të bërë më të mirën, u jepte mundësinë dhe gazetarëve të rinj të shprehnin talentin e tyre”, u shpreh Rakipllari.
