Itali, plagoset shqiptari me 7 plumba, u qëllua nga 2 persona me skuter

Një 43-vjeçar shqiptar është plagosur me armë zjarri në Itali. Ngjarja e rëndë raportohet te kete ndodhur mbrëmjen e së shtunës, në qytetin Giugliano. Sipas asaj që raportojnë mediat italiane, shqiptari ka deklaruar se ishte viktimë e një grabitje të armatosur.
Bëhet fjalë për shqiptarin Roland Lleshi, i cili u qëllua nga dy persona, të cilët po lëviznin me një skuter. Ai eshte qëlluar me 7 plumba, të cilat i shkaktuan plagë në këmbë, bark dhe duar.
43-vjeçari u transportua në spital dhe pavarësisht plagëve të shumta, është jashtë rrezikut për jetën.
Mediat italiane shkruajnë se shqiptari është i njohur për autoritet italiane, pasi dyshohet se ka qenë pjese e grupeve kriminele të trafikut të drogës dhe armëve.
Ndërkohë që pritet një analizë më e thelluar dhe hetuesit janë në kërkim të ndonjë dëshmitari që mund të japë detaje për atë që ka ndodhur.
Personeli shëndetësor konfirmoi se 43-vjeçari iu nënshtrua një operacioni dhe tani mbetet nën vëzhgim jashtë rrezikut për jetën. Bashkëpunimi i tij me forcat e rendit mund të jetë vendimtar për të hedhur dritë mbi këtë sulm dhe motivet e mundshme pas sulmit.
Policia e Giuglianos është duke punuar intensivisht për të hedhur dritë mbi dinamikën e ngjarjes dhe për të identifikuar autorët e përfshirë në ngjarje. Aktualisht janë duke u shqyrtuar disa pista të ndryshme, përfshirë edhe ato që mund të kenë lidhje me krimin e organizuar. Mungesa e raportimeve në numrin e urgjencës e bën situatën edhe më komplekse për hetuesit, të cilët tani duhet të mbështeten vetëm në dëshmitë dhe provat e mbledhura në vendngjarje.
Rrethanat e episodit shtrojnë pikëpyetje mbi motivet e sulmit nga dy autorët ndaj viktimës. Skena e krimit ka qene e izoluar per me shume se 20 ore për të mbledhur çdo provë të mundshme, përfshirë pamjet nga kamerat e sigurisë, që mund të jenë kyçe për zbulimin e identitetit të sulmuesve.