Ksenofon Krisafi është negociatori i ri propozuar për të qenë pjesë e bisedimeve me Greqinë.
Në një intervistë për ‘’Fax News” Krisafi u shpreh se ai ka pasur takime si me presidentin Meta ashtu edhe me ministrin e jashtëm Ditmir Bushati.
Krisafi është një njohës i mirë i çështjeve të së drejtës ndërkombëtare, pasi ka qenë kryesues i grupit negociator për ndarjen e zonave detare dhe ekonomike me Italinë.
Krisafi theksoi se ka shumë rëndësi që politika të qëndrojë mënjanë, dhe negociatat t’iu lihen ekspertëve, duke pasur si bazë respektimin e Kushtetutës.
“Unë jam i familjarizuar për marrëveshje të kësaj natyre, pasi edhe më herët kam qenë kryesues i grupit negociator me Italinë. Edhe në këtë moment delikat që ne kemi me Greqinë është e rëndësishme që ne të kemi kujdesin e duhur.
Palët kanë detyrën që të sheshojnë mosmarrëveshjet që kanë lindur mes dy vendeve. Nga sa e kam ndjekur këtë çështje, ky është një hap në kohën e duhur. Jam shumë i entuziazmuar,dhe besoj se do të ketë një marrëveshje që do iu shërbejë të dy vendeve, dhe brezave që do të vijnë.
Ka shumë rëndësi serioziteti, përgjegjshmëria po edhe qëndrimi politik i të dy anëve. Unë nuk e di se kush e mori vendimin që unë të jem pjesë e grupit negociator, ajo që di të them është se unë kam pasur takime me të dy, si me presidentin Meta ashtu edhe me ministrin Bushati.
U kam dhënë të dyve sygjerimet dhe mendimet e mija në aspektin teknik. Si qytetar i këtij vendi dhe si intelektual unë nuk mund ta refuzoja propozimin për të qenë pjesë e grupit negociator.
Janë probleme delikate dhe shumë të rëndësishme, besoj se delegacioni që është zgjedhur do dijë që ta përballojë këtë ngarkesë. Ne jemi një popull që na katakterizon fryma europianiste, ka ardhur koha që ne të zëmë vendin që na takon”, u shpreh më tej Krisafi.
(E.K/FAXWEB)
Discussion about this post