Një automjet, tip Jaguar, me targa AA 018 RA, është përfshirë nga flakët në afërsi të stacionit të trenit në Durrës, tek stacioni i autobusave të Shijakut.
Automjeti që u përfshi nga flakët rreth orës 15.10 është në pronësi të 26-vjeçarit Skerdi Bello, i cili në zgjedhjet e 25 qershorit ishte një nga kandidatët në listën e LSI për qarkun e Durrësit. Mësohet se Bello është punonjës i ALUIZNI-t Durrës.
Sipas policisë, e cila i referohet deklaratës se pronarit të makinës, automjeti sapo kishte dalë nga servisi dhe i është nxehur motori, e për pasojë është përfshirë nga flakët. Fatmirësisht nuk ka të lënduar.
Njoftimi i policisë Durrës:
Më datë 14.07.2017, rreth orës 15:10, në lagjen Nr.4, Durrës, ka marrë flakë dhe është djegur në pjesën e përparme mjeti tip Jaguar, në pronësi të shtetasit S. B.
Mjeti ka qenë në ecje dhe nga deklarimi paraprak i shoferit të automjetit, njëkohësisht edhe pronari , shtetasi S.B. rezulton se mjeti sapo ka dalë nga servisi dhe duke ecur ka konstatuar se i është nxehur motori dhe më pas ka marrë flakë pjesa e përparme e mjetit.
Dyshohet se shkaku i zjarrit është aksidental.
Grupi hetimor po punon për zbulimin e plotë të ngjarjes.
