Ditën e sotme një i ri nga qyteti i Elbasanit ka rënë nën prangat e Policisë pasi u kap me armë pa leje në makinën e tij.
Specialistët për Krimet në Komisariatin e Policisë, Elbasan bënë arrestimin në flagrancë të shtetasit Erion Çapja, 28 vjeç, banues në Elbasan.
I riu është pjesë e fisit Çapja, fis i njohur ky për policinë në Elbasan, pasi vitet e fundit, ata janë përfshirë në shumë ngjarje kriminale si pasojë e hakmarrjes, por paraprakisht rezulton se 28-vjeçari nuk është i përfshirë në ngjarje kriminale.
Arrestimi i tij u bë në Lagjen “Emin Matraxhiu”, gjatë kontrollit të ushtruar në automjetin me targa AA 831 LU. Pas ndalimit dhe kontrollit fizik edhe në automjet, rezultoi se 28-vjeçari mbante me vete një armë zjarri pistoletë me mulli me 6 fishekë të kalibrit 9 mm. Përveç armës, policia, gjithashtu sekuestroi edhe automjetin që drejtohej nga shtetasi Erion Çapja.
Nisur nga ngjarjen e fundit, ku janë përfshirë anëtarë të fisit Çapja, Policia mban vazhdimisht nën kontroll pjesëtarët e saj. Sa i takon rastit të kapjes me armë të Erion Capjas, Policia thotë se arrestimi i tij është bërë gjatë një kontrolli rutinë.
Nga ana tjetër, sqarohet se nuk ka të dhëna se 28-vjeçari po përgatiste ndonjë akt kriminal, por armën e mbante për t’u vetëmbrojtur, kjo për shkak të një konflikti të nisur në vitin 2005, mes Agron Çapjas dhe disa të rinjve, po nga qyteti i Elbasanit. Pas kësaj, nisi një seri hakmarrjeje që ka sjellë me dhjetëra viktima. Ngjarja më e fundit është ajo e shkurtit të vitit 2016, ku mbetën të vrarë katër persona nga fisi Çapja dhe tetë të tjerë u plagosën.
(E.K/SHUPLAKA)
Discussion about this post