Zbulohen fakte të reja nga operacionin ‘VJOSA’ të ndërmarrë nga Policia e Gjirokastrës tre ditë më parë në fshatin Buz të Tepelenës ku u arrestua një person pasi në banesë iu gjetën armë dhe lëndë narkotike.
Faxweb.al mëson se i arrestuari është Dine Kika 40 vjeç, infermieri i fshatit ndërsa ditën e sotme ia ka dalë para togacve të zeza të kryesuar nga Blerta Cibuku, e cila ka dhënë masën e arrestit “Burg pa afat” për infermierin e fshatit.
Sipas Policisë, tre ditë më parë Kikas i’u gjetën në banesë armë dhe municione pa leje si dhe një sasi kanabisi në automjet. Mirëpo nën dritën e fakteve të reja të percjella sot në seancën gjyqësore të mbajtur në Shkallën e Parë të gjyqësorit, bëhet e ditur se Dine Kika ka qenë tërësisht i painformuar për armët që i jane gjetur, si dhe për kanabisin.
Gazetarja e Fax News Ervina Shehu raporton se avokati mbrojtës i infermierit të Buzit, ka pohuar sot në seancën gjyqësore se armët e gjetura, kanë qenë të aty pa u ngacmuar që prej 1997 dhe ndërkohë që një armë gjahu ka qenë me leje në emër të të atit që nuk jeton më.
Kika u akuzua edhe për kanabisin, rreth 1.5 kg që u gjet në një automjet të parkuar para banesës së tij, ndërsa në sallën e gjyqit ai tha se nuk është makina e tij duke pretenduar se nuk ka prova që vërtetojnë pronësinë e saj nga ana e tij. Ai tha se makina ka qenë e parkuar në rrugën para shtëpisë dhe që nuk ka asnjë lidhje apo dijëni për sasinë e kanabizit që është gjetur brenda saj.
Këto argumenta të servirura nga avokati i 40-vjeçarit Kika, Agron Ilijazi, nuk kanë mjaftuar për të dhënë një masë më të lehtë, por gjykatesja Cibuku bazuar mbi argumentat e prokurorit Julijan Cafka, ka dhënë masën “burg pa afat” ndaj infermierit të fshatit.
(F.GJ/FAXWEB.AL)
Discussion about this post