Nga momenti në moment pritet që Partia Demokratike të zbulojë listat e kandidatëve të saj për deputetë për zgjedhjet e 25 qershorit. Kjo pasi afati për ta bërë këtë skadon në mesnatë.
Ndërkohë kemi mësuar se në listat e PD-së do të kandidojë edhe ish-deputeti Dashamir Tahiri, të cilit gjatë muajit dhjetor të 2016-ës, iu hoq mandati për shkak të ligjit të dekriminalizimit.
Kjo me arsyetimin se ai nuk ka deklaruar në formularin e “Dekriminalizimit” të dhëna të cilat e implikojnë me falsifikimin e parave. Tahiri zbulohet se do të kandidojë i pesti në qarkun e Vlorës.
Ndërkohë kreu i LZHK-së Dashamir Shehi, do të kandidojë i dhjeti në qarkun e Tiranës. Ndërsa kreu i PBDNJ-së Vangjel Dule mësohet se do të kandidojë në qarkun e Vlorës.
Janë zbardhur edhe emrat e kandidatëve të Partisë Republikane që do të jenë në listat e PD-së. Në listën e Tiranës do të jenë dy kandidatë, si më poshtë:
-Fatmir Mediu i 5-ti në Tiranë
-Blendi Sulaj, i 14 në Tiranë
Më herët dolën edhe emrat e PAA në listën e PD. PAA do të ketë kandidat të 5-të në Fier, Olsi Cukaj, në Tiranë renditet i 13-i Adi Haxhiymeri, ndërsa vetë kryetari i kësaj partie Agron Duka renditet i 5-ti në listën e Durrësit. Ndërsa kreu i PDK-së Nard Ndoka do të kandidojë në Shkodër, por ende nuk dihet se si do jetë renditja.
Kujtojmë se mesnata e sotme është dhe afati i fundit i dorëzimit të listave në KQZ. Nga momenti në moment pritet publikimi i listës përfundimtare të Partisë Demokratike. (D.D/Shuplaka)
Discussion about this post