Ka vijuar gjatë ditës së sotme protesta e katër bizneseve, të cilat janë të vendosura pranë Rugës së Kavajës në kryeqytet, aktiviteti i të cilave është bllokuar nga ana e Policisë.
Sipas tyre kjo është një grabitje e pastër që iu është bërë nga ana e qeverisë, sa kohë që për shpronësimin e tyre nuk ka ende një vendim të formës së prerë nga ana e Gjykatës.
Pronarët shprehen se pas grabitjes së pronave të tyre fshihen interesa të oligarkëve, pasi trualli ku janë vendosur dyqanet mund të përdoret për ndërtimin e kullës së radhës.
“Ky është problem ynë, jemi me certifikata të rregullta pronësie, e kemi çuar cështjen në apel kemi dy vite. Përpara disa ditësh pa asnjë urdhër me shkrim kanë ardhur me polici dhe na kanë bllokuar dyqaneve, kanë bllokuar edhe mallrat që kanë qenë brenda.
Nuk na kanë bërë asnjë lajmërim, ne presim vendimin e Apelit, do ta çojmë çështjen deri në Strasburg, ne kemi besim te Gjykatat e rregullta, për gjykatat e korruptuara ku gjykatësi deklaroi se mbreti është Edi Rama nuk kemi se çfarë të themi”, u shpreh një prej pronarëve.
“Është vënë syri për të ndërtuar një 20-katësh këtu, madje kanë arritur deri aty sa na kanë thënë sesa metra doni që tiu japim”, tha më tej qytetari.
Në mbështetje të protestës së tyre kanë qenë sot dhe ish-deputetët demokratë Orjola Pampuri dhe Klevis Balliu.
(E.K/Faxweb.al)
Discussion about this post