Shtëpia e dy të moshuarve në qytetin e Laçit është përfshirë nga flakët duke i lënë ata të pastrehë. Të sëmurë, pa fëmijë e pa asnjë të ardhur, çifti it ë moshuarve strehohet në një kasolle bagëtish. Përfaqësues të bashkisë ende nuk kanë marrë asnjë masë për ta, ndërsa të moshuarit apelojnë për ndihmë.
Familja e Dodë Gjokës në qytetin e Laçit ka mbetur në qiell të hapur.
Varfërisë së tejskajshme dhe vetmisë së tyre, u është shtuar edhe djegia e banesës. Familja Gjoka banon në lagjen nr 2 të qytetit të Laçit, asnjeri prej tyre nuk kanë pension e që të dy janë të sëmurë dhe pa fëmijë.
Djegia e plotë e banesës i ka lënë ata në qiell të hapur dhe natën mbështillen me plastmas pranë një kasolle bagëtish që e kanë pranë banesës së djegur pasi nga pamundësia nuk mund të rregullojnë asgjë nga banesa totalisht e djegur.
E vetmja e ardhur që ka kjo familje janë 3000 lekë në muaj që ato marin nga një përkrahje sociale që u derdhet vetëm para pak kohësh nga bashkia e Laçit.
Dodë e Dila Gjoka thonë se shkak i zjarrit ka qenë një shkëndijë elektrike e shkaktuar nga përplasja e telave si pasoje e erërave të forta.
“Unë- thotë Dila- dola të shoh bagetinë në stan se mendova se mos po na vidhnin bagëtite kur pashë që po na digjej banesa, menjëhere dolëm jashtë e mezi shpëtuam kokën”.
Të pyetur nëse bashkia ka marrë ndonjë masë për ti ndihmuar ata thonë se përfaqësues të bashkisë kanë evidentuar dëmet e shkaktuara nga djegia e banesës, por asnjë masë apo ndihmë nuk u është dhënë nga ana e tyre.
Në moshë të thyer, të sëmurë e në një varfëri ekstreme, tragjedisë së çiftit të vetmuar i shtohet edhe djegia e banesës në mes të të ftohtit.
Ata burrë e grua bëjnë thirrje për ndihmë nga shteti e kushdo që ka mundësi, me shpresën e madhe se dikush do tu vijë në ndihmë për t’ua lehtësuar sadopak vuajtjet e tyre e të paktën të kenë një vend ku të strehohen. Deri tani të vetmit që janë bërë të gjallë jemi ne.
Discussion about this post