Ushtria izraelite njoftoi këtë mëngjes se kishte nisur një operacion të ri tokësor në qytetin e Gazës , më pak se 48 orë pasi kryeministri izraelit Benjamin Netanyahu u zotua të rrisë presionin ushtarak ndaj Hamasit derisa të sigurojë lirimin e pengjeve që ende mbahen nga lëvizja islamike palestineze në Rripin e Gazës.
“Gjatë orëve të fundit, forcat izraelite filluan të kryejnë operacione tokësore në zonën Sujaiya me qëllim të zgjerimit të zonës së sigurisë,” tha ushtria izraelite në një deklaratë, duke iu referuar zonës tampon të krijuar nga ushtria izraelite brenda Rripit të Gazës përgjatë kufijve me Izraelin dhe Egjiptin.
“Si pjesë e këtij operacioni, ushtarët eliminuan shumë terroristë dhe shkatërruan infrastrukturën terroriste të Hamasit , kryesisht një qendër komandimi dhe kontrolli” thuhet në deklaratën ushtarake izraelite.
Pas një armëpushimi dy mujor Izraeli rifilloi operacionet në Gaza më 18 mars, duke thënë se presioni ushtarak është mjeti i vetëm për të detyruar Hamasin të dorëzojë rreth 60 pengje, të vdekur apo të gjallë që i mban ende në enklavën palestineze.
“Ne po copëtojmë Rripin e Gazës dhe po rrisim presionin, hap pas hapi në mënyrë që pengjet tanë të na kthehen”, tha Netanyahu të mërkurën.
