”Ja ç’do marrin në këmbim”, Spiropali dhe Balla hedhin teori konspiracioni për protestën

Teksa protesta e opozitës është duke vijuar prej më shumë se tre orësh, ka pasur disa reagime të njëpasnjëshme nga ana e qeverisë.

Pas kryeministrit Edi Rama dhe ministrit Sandër Lleshaj, kanë pasur reagime në rrjetet sociale dhe ministrja për Parlamentin Elisa Spiropali si dhe kreu i grupit në PS Taulant Balla.

Spiropali shkruan: Janë aq të verbuar nga dëshpërimi prej humbësish, sa edhe po ta mësyjnë non-stop, nga 10 herë në ditë 10 vjet rrjesht kryeministrinë dhe parlamentin, e vetmja gjë që do marrin në këmbim është mesazhi ngushëllues i Berishës për protestën më të madhe në botë!

Ndërkohë që Balla shkon edhe më tej duke thënë se protesta e opozitës është kordinuar me protestat që po mbahen në Malin e Zi dhe në Serbi, dhe po udhëhiqet nga politikanë të korruptuar.

”Të bindur se dalin humbës në zgjedhje, sepse shqiptarët nuk mund të besojnë të ardhmen e tyre tek Saliu, Monika dhe Luli, opozita po tenton të bëjë gjithçka vetëm e vetëm për të destabilizuar vendin, pasi ata vetë janë të qartë se përmes votës nuk mund të vijnë në pushtet. Dhuna kundër punonjësve të Policisë së Shtetit dhe institucioneve demokratike është e dënueshme”, shkruan në një tjetër postim Balla.

(E.K/FAXWEB.AL)