Një 36-vjeçare me origjinë nga Përmeti dhe banuese në Tiranë është vënë në pranga nga policia. Ajo akuzohet për veprën penale”Mashtrim me pasoja të rënda”.
Amarilda Leka hiqej si juriste pranë Gjykatës së Lartë dhe kishte marrë 50 mijë euro që të nxirrte nga burgu një person të dënuar me 30 vite burg për vrasje.
Leka ka qënë drejtuese e shtabit elektoral të PS, pranë ish-ministres Mirela Harito. Ajo hiqej sikur ishte nusja e djalit të ish-ministrit Luan Hajdaraga.
Por Leka nuk është një personazh i panjohur për policinë e sidomos për publikon, pasi kjo e fundit është përfshirë në disa ngjarje të tilla mashtruese.
Njoftimi i policisë për arrestimin:
Bashkëpunimi i ngushtë mes Policisë dhe Prokurorisë çon në pranga një 33-vjeçare për “Mashtrim me pasoja të rënda”.
Finalizohet operacioni policor “Bënça”, i ndjekur prej një viti me metoda proaktive.
Operacioni nga Drejtoria Hetimore Qendrore në Departamentin e Policisë Kriminale, në bashkëpunim të ngushtë me Prokurorinë e Rrethit Gjyqësor Tiranë dhe Drejtorinë Vendore të Policisë Tiranë.
Drejtoria Hetimore Qendrore në Departamentin e Policisë Kriminale, në bashkëpunim me DVP Tiranë, në kuadër të operacionit policor të koduar “Bënça” bëri ekzekutimin e vendimit Nr. 2541, datë 13.11.2019 të Gjykatës së Shkallës së Parë Tiranë, e cila ka vendosur masën e sigurisë personale “Arrest në burg” për shtetasen:
A. L., 36 vjeçe, lindur në Permet dhe banuese në Tiranë.
Në ngarkim të kësaj shtetaseje, Njësia Hetimore Qëndrore përcolli në Prokurorinë e Tiranës materiale hetimore dhe Prokuroria pranë Gjykatës së Shkallës së Parë Tiranë, në bazë të materialeve të referuara regjistroi procedimin penal, për veprën penale “Mashtrimi me pasoja të renda”.
Pas gati një vit hetimesh proaktive u bë i mundur dokumentimi me prova ligjore i veprimtarisë kriminale të ushtruar nga kjo shtetase.
Kjo shtetase ka mashtruar shtetasin B. Z., me banim në Tepelenë, duke i marrë 50 000 euro, me pretendimin se ishte juriste pranë Gjykatës së Lartë Tiranë dhe me njohjet që ajo kishte do të ndikonte pranë trupës gjykuese në Gjykatën e Apelit për Krimet e Rënda Tiranë dhe në Gjykatën e Lartë pët të nxjerrë nga burgu shtetasin A. M., i dënuar me 30 vjet heqje lirie, për një vrasje në rrethana rënduese që kishte kryer në Memaliaj, në vitin 2015, i cili është duke vuajtur dënimin në IEVP Bënçë, në Tepelenë.
Materialet shtesë i kaluan Prokurorisë së Rrethit Gjyqësor Tiranë.
