Ish-deputeti Ervin Salianji ka qenë sot në seancën e parë gjyqësore ndaj tij, që lidhet me çështjen e shumëpërfolur Babale.
Duke folur për gazetarët pas seancës Salianji tha se datat e shortit janë falsifikuar dhe se po tentohet që të hiqet vëmendja nga çështjet aktuale.
Salianji tha se vëmendja e tij sot është vetëm tek protesta që do të mbahet në orë 18:30.
“Atëherë sot siç e dini është seanca e parë gjyqësore për çështjen Xhafa siç quhet Babalja. Jam sot këtu në respekt ndaj jush dhe qytetarët, sepse shumë i kam respektuar institucionet kur ka qenë puna për denoncimet e krimit dhe të përfshirjes së tij në nivelet më të larta të qeverisjes.
Pa diskutim që Edi Rama dhe qeveria e tij ka disa njerëz që i paguan nga taksat e qytetarëve, që për fat të keq janë prokurorët, të cilët duan ta zhvendosin apo ta mbajnë vëmendjen tek opozita apo tek varrosja e çështjeve të renda të korrupsionit dhe lidhjet e qeverisë me krimin.
Qytetarët janë lodhur nga një drejtësi që nuk bën drejtësi por bën padrejtësi dhe është varrmirrëse e çështjeve më të rënda.
Pa diskutim, ashtu siç Rama ka disa njerëz që i paguan nga taksat e qytetarëve për t’i përdorur kundër atyre që I denoncojnë, tani më edhe unë do ta ndjek çështjen nëpërmjet avokatëve, dhe do të vij kur të pranohet dëshmia e Ramës, Ballës, Xhafës dhe të gjithë personave të tjerë të përfshirë në këtë çështje.
Do bëj kallëzim për drejtuesit e policisë, të gjitha atyre që janë të përfshirë në këtë çështje.
Qytetarët kërkojnë punësim dhe përballen me agresion. Sot në orën 6 e gjysmë i bëj thirrje qytetarëve që të bashkohen me ne dhe të ndryshojnë sistemin…
Nuk ka frikë. Frika ime më e madhe është që ndonjëherë mund te kem frike, larg qoftë ta tregoj që kam, lere më te frikësohem nga Rama qe është kthyer në një dordolec që nuk tremb as sorrat”, u shpreh ai.
