Tre gjyqtarët e Gjykatës së Apelit të cilëve u ishte besuar shqyrtimi i dosjes së ish-deputetit Mark Frroku kanë dhënë dorëheqjen.
Sipas BW, shkaku është se tre gjyqtarët e kanë gjykuar më herët ish-deputetin kristiandemokrat. Fatmira Hajdari, Andi Civici dhe Shkëlqim Mustafa, shprehen përmes një shkrese se janë në konflikt interesi për të gjykuar dosjen në fjalë.
Shkresa zyrtare i është dërguar kryetarit të gjykatës sëbashku me aktin e dorëheqjes. Kështu, në rast se dorëheqja do t’u miratohet gjyqtarëve, atëherë dosja “Frroku” do të hidhet në short edhe një herë tjetër.
Kujtojmë se Mark Frroku është dënuar me 7 vite e gjashtë muaj burgim për akuzat e pastrimit të parave, ndërtimit të paligjshëm për qëllime interesi dhe fshehjes së pasurisë.
Ndërkohë ai akuzohet edhe për vrasjen e Aleksandër Kurtit, në Belgjikë, mirëpo për këtë akuzë Frroku është shpallur i pafajshëm. (D.D/Shuplaka)
Discussion about this post