“Je Suis Scanderbeg”, Harizaj-Lames: Hipokrizi, nuk shpërndante legalizime Skënderbeu ditën e natën

Është kthyer në një temë të nxehtë debati për “mbulimin” e bustit të Skënderbeut gjatë faljes së namazit nga ana e besimtarëve mysliman në shëshin “Skënderbej” mëngjesin e sotëm.

Disa nga analistë madje kanë reaguar ashpër për këtë “çështje”. Artan Lame ishte njëri prej tyre. Lame në një postim me titull “Je Suis Scanderbeg” tha se ishte gati të bëhej një hero për të mbrojtur Skënderbeun.

Mirëpo, pas postimit të Lames, gazetari Edmond Harizaj ka ironizuar në lidhje me postimin e kreut të ALUIZNI-t, duke shkruar se “Lame qënka tallur me shokun e klasës”. Harizaj I referohet postimit të Lames ku kishte shkruar se “ ishte tallur me Skënderbeun”. Ndërsa shigjeton Lamen duke I kujtuar se Skënderbeu nuk shpërndante legalizime ditën e natën.

POSTIMI I LAMES:

JE SUIS SCANDERBEG
E kam qeshur e jam tallur me Skënderbenë, sa pa dyshim e kam tepruar. Kam bërë ironi dhe i kam rënë në qafë, sa s’di si më ka duruar. Por i kam bërë këto se e dua Skënderbenë njeri me mish e kocka me halle e telashe, jo si një mit të kalçifikuar nga ata që pastaj themi “pale a ka qenë”.
Ashtu sikundër çdo i krishterë i mirë, e do Jezunë si njeri që zbriti mes vdektarëve e dha jetën për ta. Ashtu sikundër çdo muhamedan i mirë, e do Muhametin si njeri që ulur këmbëkryq u shpjegon të thjeshtëve udhën e drejtë. Ashtu edhe unë e dua Skënderbenë si njeri që mes njerëzve të tij, me gjoks përballte të keqen e madhe të kohës vet, ndërsa me kurriz mban edhe llafet e kohës sonë.
Por sot Skënderbenë tim ma zunë me perde që të mos shihej se si mbretëron e kalëron mbi kalë tash 550 vjet. Sot i zunë të pamët të mos i shihte, neser një zot e di se ç’mund t’i bëjnë.
Ndaj sot jam i gatshëm nga njeri të bëhem hero, për të mbrojtur heronë-njeri. Sot ndjehem i gjithi “je suis Skanderbeg”. E në qofshim shumë, s’kanë ç’i bëjnë heroit. (B.H/Shuplaka)