Arben Skënderi, i cili është anëtar i Kryesisë së Partisë Demokratike, ka folur për situatën e vështirë në të cilën ndodhet forca e tij politike, pas humbjes së zgjedhjeve të 25 qershorit.
I ftuar në studion e Ora Neës, Skënderi tha se kryetari Lulzim Basha duhet të tregohet një lider përbashkues dhe se vendi po shkon drejt zhdukjes së opozitës.
“Zoti Basha bëri disa veprime pak në panik pas rezultatit të zgjedhjeve. Është e vërtetë. Sot jemi në momentin që ka një tronditje të madhe për atë çka ndodhi me rezultatin e zgjedhjeve, përtej pritshmërive. Sot jemi në një moment shumë të rëndë dhe jemi gati në zhdukjen e opozitës. Janë shumë parametra që po infektojnë gjithçka ndodh.
Kjo parti si rezultat i zgjedhjeve, si evenimentet e fundit që po ndodhin po e tkurrin. Po e tkurr fakti që na mungojnë 200 e ca mijë votues të djathtë. Ajo që u predikua që në momentin e parë në vend që të ftoheshin të gjithë demokratët, gjëja e parë që u anonçua nga zt. Basha; u atakuan një pjesë e demokratëve në deklaratën e zt.Basha dhe shpalljen me urgjencë të datës së zgjedhjeve.
Kush është urgjenca kaq e madhe për të bërë zgjedhje patjetër më datë 22 korrik? Në këtë rast na u zbatoka statuti i partisë pikë për pikë dhe ndërkohë ajo që kërkojmë ne është mbledhja e Këshillit Kombëtar. Ka dy lloj liderësh, lider përçarës dhe lider përbashkues. Zt. Basha ka ende hapësirë të bashkojë. Unë pres që ai të tregohet lideri përbashkues dhe të thërrasë të gjithë kundërshtarët për të parë çfarë na ka ndodhur, gjithë elementët e fushatës.”, ishin fjalët e Skënderit.
Kujtojmë se Partia Demokratike arriti të marrë vetëm 43 mandate, kundrejt 74 të PS-së dhe 19-të të LSI-së në zgjedhjet e 25 qershorit. Aktualisht është shpallur dita e zgjedhjeve për kreun e saj që do të jetë 22 korriku. (D.D/Shuplaka)
