Festat e Nëntorit rezervojnë një sërë aktivitetesh për qytetarët e Tiranës, çka u mundëson atyre shkëputjen nga rutina. Me rastin e 104-vjetorit të Shqipërisë, Bashkia e Tiranës ka organizuar ekspozita, lojëra të ndryshme, kinema dhe koncertin e “Natës së Bardhë” me të ftuar këngëtaren italiane Giusy Ferreri. E nëse jeni të pavendosur se sit a kaloni ditën e sotme, keni ende kohë për të zgjedhur mes aktiviteteve të ndryshme.
Institucionet e artit dhe kulturës do të hapin dyert për vizitorët me ekspozita, filma dhe koncerte. Përmendim këtu ekspozitën “104-vjetori i shpalljes së Pavarësisë së Shqipërisë” që zhvillohet në hollin kryesor të Muzeut Historik Kombëtar. Galeria Kombëtare e Arteve do të qëndrojë gjithashtu e hapur nga ora 18:00 deri në orën 02:00 pas mesnate ku do të prezantohen dy skulptura të artistit bashkëkohor Eltjon Valle. I hapur do të jetë edhe Mozaiku i Tiranës.
Për të apasionuarit pas muzikës operistike, do mund të ndjekin operën “Skënderbeu” të Preng Jakovës që rikthehet në skenën e TKOB, e për ata pas kinemasë, “Cineplex” ofron filmat më të mirë shqiptarë ndër vite për vetëm 200 lekë. Një sërë aktivitetesh janë organizuar edhe për vogëlushët, të cilët në shoqërinë e prindërve, do të kenë mundësi të ndjekin shfaqje me kukulla nga trupa e Teatrit të Kukullave që do të jepen nga ora 10:30 – 11:00, koncertin festiv me fëmijët e qendrës kombëtare të kulturës për fëmijë që do të nisë nga ora 11:00 deri në 12:30 ose filmat vizatimorë, të cilat do të shfaqen nga Kinemaja Shqiptare përgjatë orarit 12:30 – 18:00.
Discussion about this post