Jep dorëheqjen drejtori i Tatimeve Tiranë, Stefanaq Koto. “Shuplaka” mëson se ai ka dhënë dorëheqjen nga detyra gjatë ditës së premte. Burime të brendshme për portalin tonë kanë bërë me dije se shkak i dhënies së dorëheqjes është bërë mosfunksionimi i degës së Tatimeve Tiranë.
Këto burime shprehen për “Shuplakën” se Kote ka parë si pengesë gjatë punës paaftësinë e punonjësve dhe një nga arsyet e dorëheqjes së tij kanë qenë punësimet në institucionin që drejtonte. Gjatë drejtimit të tij mësohet se janë punësuar shumë militantë partie joprofesionistë.
Drejtoria e Tatimeve Tiranë mund të konsiderohet një institucion delikat i përfolur shpesh për largime e zëvendësime në poste drejtuesish. Mbetet për të mësuar nëse Z. Stefanaq Koto ka dhënë dorëheqjen vetëm për këtë arsye apo ka dhe shkaqe të tjera.
Kujtojmë se vetëm tetë muaj më parë, ai u emërua në këtë post pas largimit të bujshëm të ish-kryetatimorit të Tiranës, Androkli Kokthi.
Përpara vendosjes në krye të Drejtorisë së Tatimeve Tiranë, Stefanaq Koto, ka drejtuar Drejtorinë e Kontrollit Tatimor në Drejtorinë e Përgjithshme. Ai ka një eksperiencë të gjatë në tatime. (XH.A/SHUPLAKA)
