Ramush Haradinaj ka dhënë dorëheqje nga posti i kryeministrit të Kosovës. Në fund të mbledhjes së Qeverisë ai ka bërë të ditur se ka dhënë dorëheqje të parevokueshme. Arsye e këtij vendimi ka thënë se ka marrë thirrje për t’u paraqitur për t’u marrë në pyetje në Speciale si i dyshuar.
Haradinaj ka deklaruar para mediave Kosovare se ka vendosur të japë dorëheqjen pasi është thirrur për t’u marrë në pyetje nga Gjykata Speciale.
Haradinaj tha se ka zgjedhur të shkoj para drejtësisë si qytetar e jo si kryeministër, por shtoi se pavarësisht kësaj, nuk e ka dashur këtë realitet.
“Kam vënë në dije paraprakisht kabinetin qeveritar, dhe kam vendosur të jap dorëheqjen sepse nuk dua të dal para drejtësisë si kryeministër por si qytetar i thjeshtë i Kosovës. Me këtë dorëheqje deri në formimin e qeverisë së re përgjegjësia i takon presidentit për të caktuar datën e re të zgjedhjeve. Unë i afrohem për të marrë përsëri mbështetjen e popullit sepse unë nuk jam i akuzuar. Emocional edhe mund të jem veçse lotët nuk po i shoh askund. Ky është realiteti, unë nuk e kam zgjedhur këtë realitet. A do me shku para drejtësisë në postin e Kryeministrit apo jo? Unë kam zgjedhur të shkoj si qytetar i thjeshtë” tha Haradinaj teksa iu përgjigj edhe pyetjes së një gazetari që i përmendi emocionet gjatë komunikimit.
A është kjo diçka qe po ju behet politikisht?
“S’po e mendoj njëherë këtë gjë. Ne jemi Sovran, kemi nderin tonë kombëtar, shtetëror dhe qytetar. Nuk do të mundet kush me e kërcënu Kosovës asnjëherë”, tha Haradinaj.
https://www.facebook.com/RamushHaradinajOfficial/videos/2387203418182020/
Postimi i Haradinajt ne facebook:
Të nderuar qytetarë,
Dua të ju informoj se sot kam marrë këtë vendim:
Jap dorëheqje të parevokueshme nga detyra e Kryeministrit të Republikës së Kosovës dhe dua që të ju falemnderoj për besim dhe përkrahje. Arsyeja e këtij vendimi është se kam marrë thirrje të paraqitem për t’u marrë në pyetje nga Dhomat e Specializuara në Hagë si i dyshuar.
Qeveritë dhe pushtetet janë të ndërrueshme, jetojmë në demokraci.
Nderi i Kryeministrit dhe Shtetit duhet të ruhet dhe unë nuk e poshtroj asnjëherë. Në Hagë si Ramush Haradinaj do t’i dal përball shpifësve, ashtu si e kërkon nderi i luftëtarit shqiptar.
Pastërtia ime dhe e luftës së UÇK-së, e konfirmuar nga dy aktgjykime nuk mund të njolloset nga askush dhe asnjëherë.
Shteti im është Kosova, e paprekshme në multietnicitet, shumëgjuhësi, në territor e kufijë.
Kosovës i bëhet presion i padrejtë për çmimin e njohjes nga Serbia. Ndarja apo Dodik Republika janë të papërballueshme për Kosovën dhe stabilitetin e rajonit.
Si Kryeministër i Qeverisë së Kosovës besoj fuqishëm se çmimi për njohje është tregu dhe për këtë taksa duhet të jetë çmimi i njohjes.
Bashkësia ndërkombëtare po bën gabim që po insiston në çmim të papërballueshëm për Kosovën për njohje. Lidershipi Kosovar po bën gabim se nuk po e fuqizon legjitimitetin e vendimit për taksën ndaj Serbisë. Herët a vonë do ta kuptojmë se sa dëm i madh po i bëhet vendit me këtë mosunitet.
Kosova euro-atlantike është e interesuar për njohje reciproke në kufijtë ekzistues. Dialogu për njohje është edhe rruga për tregti të lirë me Serbinë. Kurrë nuk është vonë të jemi bashkë – tregu për njohje, e jo ndarja apo Republika e Dodikut.
Më lejoni të ju siguroj se: Taksa mbetet, Ushtria e Kosovës shkon para, Trepça është e gatshme për investime.
Pas kësaj dorëheqjeje MANDATIN IA KTHEJ POPULLIT. Sovrani të vendosë për udhëheqjen e ardhshme me zgjedhje të lira dhe demokratike.
I drejtohem Presidentit që në afatin kushtetues të kryejë konsultimet me partitë politike dhe t’i shpallë zgjedhjet e parakohshme.
Qeveria e vendit vazhdon të kryejë funksionet e veta pa lejuar vakuum qeveritar deri në Qeverinë e re të dalur nga zgjedhjet e lira dhe demokratike.
Menjëherë do t’i drejtohem me shkresa zyrtare për dorëheqjen e parevokueshme institucioneve të vendit dhe udhëheqësve të koalicionit qeverisës.
Do t’i shërbej me besnikëri, gjithë jetën, POPULLIT, ATDHEUT DHE SHTETIT TIM KOSOVËS! Faleminderit.
I juaji,
Ramush Haradinaj
(F.GJ/FAXWEB.AL)
