Saimir Tahiri sapo ka dhënë dorëheqjen, duke dorëzuar letrën e largimit nga detyra e Ministrit të Punëve të Brendshme, kryeministrit Edi Rama. Takimi i tyre në Kryeministri nisi pak minuta më parë.
Pritet që Saimir Tahiri të dalë në një konferencë për shtyp për të komunikuar lajmin e dorëheqjes nga posti i ministrit. Vendimi për dhënien e dorëheqjes nga detyra vjen pas situatës të nxehtë politike në vend.
Ministri i Brendshëm ka shkuar në zyrën e Kryeministrit Edi Rama për t’i dorëzuar formalisht aktin e largimit nga qeveria, ndërsa janë duke diskutuar ende brenda Kryeministrisë. Nuk dihet nëse Rama e ka pranuar dorëheqjen.
Tahiri është përfolur edhe ditë më parë si një ”opsion” i mundshëm për zgjidhjen e krizës. Demokratët prej 22 ditësh janë në protestë ku kërkojnë qeveri teknike dhe zgjedhje të lira.
Edhe më herët Basha i ka kthyer përgjigje të prerë Ramës se dorëheqja e Saimir Tahirit nuk e nxjerr atë nga çadra.
”Shuplaka” mëson nga burime të sigurta se pas dorëheqjes së Tahirit, Rama do të mbledhë të hënën Kryesinë e PS-së por njëkohësisht ajo që është më e rëndësishme është se ka në plan të ndërrojë gjysmën e ministrave të qeverisë së tij. Nuk dihet me siguri sa do t’i qëndrojë planit, i cili do të kushtëzohet edhe nga qëndrimet e opozitës, nëse ndërrimi i gjysmës së kabintetit do të nxjerrë Bashën nga çadra.
(XH.A/SHUPLAKA)
Discussion about this post