Ditën e djeshme u shënua dhe viktima e katërt nga i ftohti në vend. Pas Durrësit, Sarandës, dhe Lushnjes, këtë herë viktima vjen nga qyteti i Korccës. I identifikuar si Ilia Lifo 60-vjeç ai u gjet në një godinë të braktisur, i vetëm dhe i ngrirë prej të ftohtit.
Këto godina të ish-bonifikimit ndodheshin në një zonë disi të shkëputur nga pjesa tjetër e qytetit, me pak lëvizje dhe banorë.
Prej më shumë se një viti ai banonte I vetëm në këtë godinë, të përshtatur si banesë. Ishte ndarë nga gruaja dhe kishte dy fëmijë, një vajzë dhe një djalë njëri prej të cilëve dhe i martuar dhe me fëmijë.
Kanë qenë banorët e zonës ata që e kanë gjetur trupin e pajetë të ngrirë prej të ftohtit. Në trupin e tij nuk janë konstatuar shënja dhune.
Pas ndarjes nga familja jo rrallëherë i ndjeri e gjente ngushellimin te alkooli edhe pse kishte shfaqur edhe shumë problem shëndetësore, si diabet apo probleme me zemrën.
Në gërmadhën e përshtatur si banesë kishte vetëm pak orendi shtëpiake, mes së cilave edhe një sobë për t’u ngrohur dhe një krah me dru, që ai i kishte mbledhur për t’i përdorur në këto ditë të acarta.
Fillimisht u mendua se 60- vjeçari ishte një endacak, por kjo u mohua nga përgjegjësja e qendrës sociale Korçë, Irena Bozdo. Sipas saj, Ilia Lifo trajtohej me kemp të plotë.
“Ne e njohim rastin në fjalë dhe personi nuk mund të quhet një endacak. 60- vjeçari trajtohej me pension invaliditeti, ka të afërm, dy fëmijë të rritur. Për aq sa ne e kemi trajtuar, di të them se ka qenë zgjedhja e tij të banojë tek ajo ngrehinë. Është një invalid pune, kishte probleme me zemrën. Trajtohet me pagesë nga sigurimet në masën 14.250 lekë dhe nga shërbimi social shtetëror paguhej me 3300 lekë (të rinj). Ishte i pastrehë dhe i përfshirë nga bashkia për bonusin e strehimit me subvencionim të qirasë. Lypës nuk ka qenë asnjëherë”, u shpreh ajo. (E.K/SHUPLAKA)
