“Jo të gjithë pallatet e shpallur të pabanueshëm do të shemben”, Emergjencat Civile Lezhë: Do ketë proces të dytë rivlerësimi

Nëse një pallat është shpallur i pabanueshëm në Lezhë, jo domosdoshmërisht do të thotë se ai do të shembet. Lajmin e bëri të ditur përfaqësuesi i Komitetit Ndërministror për Emergjencat Civile në Lezhë, Etjen Xhafaj.

Përmes një videoje ai bëri bilancin e tërmetit në Lezhë dhe iu bëri thirrje banorëve që të mos nxitojnë të nxjerrin orenditë dhe mobiljet nga shtëpitë. Sipas tij, për pallatet që janë shpallur të pabanueshëm do të ketë një proces të dytë rivlerësimi.

“Së pari, duam të tërheqim vëmendjen e të gjithë qytetarëve, të cilët janë duke lëvizur të gjithë pajisjet e tyre apo orenditë nga pallatet. Jo të gjithë pallatet të cilët janë përcaktuar si të pabanueshëm, do të shemben. Pra, do të ketë një proces të dytë rivlerësimi, gjatë të cilit do të vlerësohet edhe ndërhyrja e mundshme.

Ka raste ku do të ndërhyhet strukturalisht, për gjithë të tjerat do të ketë një vendim specifik nga këshillat bashkiakë të të tre bashkive për të spcifikuar atë që do të ndodhë. Dhe pastaj do të mundësohet edhe afrimi me këto godina i qytetarëve, të shoqëruar nga Policia dhe instancat e tjera ligjore dhe shtetërore për të mundësuar tërheqjen e orendive dhe mjeteve të tyre”, tha Xhafaj.

Po ashtu, ai bëri me dije se nesër do të mblidhet Këshilli Bashkiak i Lezhës për të diskutuar rreth qirave që do të marrin banorët e prekur nga tërmeti.

“Gjithashtu është marrë një vendim i Këshillit Bashkiak Lezhë për të vijuar me bonusin e qerave për qytetarët e Lezhës. Nesër do të ketë mbledhje të Këshillave Bashkiakë, si nga Këshilli Bashkiak i bashkisë Kurbin ashtu dhe nga Këshilli Bashkiak i Mirditës për të marrë vendime në lidhje me këto.

Gjithashtu, Këshilli Bashkiak i bashkisë Kurbin do të shqyrtojë edhe njëherë situatën në lidhje me pallatet e dëmtuara. Sa u përket institucioneve publike dhe shërbimeve, sot është bërë evakuimi i një pjese të spitalit të Laçit, në bashkinë Kurbin, në drejtim të spitalit të Lezhës.

Kemi reaguar menjëherë duke shtuar shërbimet ambulatore dhe gjithashtu duke mbajtur të hapur në qytetin e Laçit shërbimet e emergjencës”, u shpreh Etjen Xhafaj.

(M. I./ Faxweb.al)