Kandidati për president të ardhshëm të Shteteve të Bashkuara nga radhët e Partisë Demokratike, Joe Biden, ka bërë hap të madh drejt fitores brenda garës partiake pasi shënoi fitore në tetë nga 14 shtetet që u përfshinë në procesin zgjedhor të martën.
Ish-nënpresidenti amerikan shënoi fitore në Massachusetts, Minnesota, Oklahoma, Arkansas, Alabama, Tennessee, Karolinë Veriore dhe Virgjinia.
Megjithatë, kandidati tjetër, Bernie Sanders, pritet të fitojë në shtetin me më së shumti delegatë, Kaliforni, dhe në tri shtete të tjera.
Pikërisht kur ishte duke folur përpara turmave në Los Angeles, Biden është përballur dhe me protestat e disa grupimeve për të drejtat e kafshëve, ku disa gra hynë në skenë dhe u desh ndërhyrja e rojeve të sigurisë për ti neutralizuar.
Gëzimi për fitoren në 8 shtete, bëri që Biden të kishte dhe një lapsus në daljet e tij publike, kur ngatërroi gruan e tij me të motrën, siç mund ta shihni dhe në videon e mëposhtme.
Bideni rrëmbeu dorën e gruas së tij dhe i tha turmës: ‘Kjo është motra ime e vogël, Valerie’.
Kur e kuptoi gabimin e tij, Biden i tregoi Valerie dhe tha: ‘Oh, jo, kjo është ajo’.
Presidenti Trump shfrytëzoi rastin për të tallur rivalin e tij, duke rikthyer një postim në mediat sociale nga Townhall.com që talleshin me gabimet e Bidenit.
(E.K/Faxweb.al)
