Gjatë takimit të sotëm me kryeparlamentarin Meta, senatori amerikan John McCain u shpreh se duhet rritur kontributi për mbrojtjen në Shqipëri pasi ka disa sfida globale dhe rajonale që kanosin sigurinë në botë.
Po ashtu sekretari i përgjithshëm i NATO-s, Jens Stoltenberg, ka kërkuar që aleatët evropianë të aleancës së NATO-s t’i rrisin shpenzimet për mbrojtjen.
“Ne ende nuk kemi ndarje korrekte të ngarkesës brenda aleancës sonë”, u ka thënë Stoltenberg gazetarëve në Bruksel, teksa ka publikuar raportin vjetor për aleancën më të madhe ushtarake në botë.
Vetëm pesë aleatë e plotësojnë synimin për shpenzimin e 2% të GDP-së për mbrojtje: SHBA, Britania, Estonia, Greqia dhe Polonia.
“Të gjithë aleatët duhet ta arrijnë këtë qëllim”, ka thënë Stoltenberg.
“Shqipëria është e gatshme të plotësojë detyrimet e saj për shpenzime për mbrojtjen në nivelin prej 2% të Prodhimit të Brendshëm Bruto”-ka theksuar ministrja e Mbrojtjes, Mimi Kodheli në kuadrin e 8-vjetorit të anëtarësimit në NATO.
Shqipëria shpenzon 1.2 përqind të GDP-së për ushtrinë, po aq sa Kroacia, Gjermania, Danimarka, Holanda dhe Sllovakia.
Ministrja Kodheli ka thënë se Shqipëria është në nivelin mesatar krahasuar me vendet e tjera të NATO-s, por në rrugën e duhur për ta arritur detyrimin prej 2%.
Sipas përcaktimit të dhënë nga NATO, shpenzimet për ushtrinë janë të gjitha shpenzimet kapitale dhe korrente të kryera për forcat e armatosura, duke përfshirë edhe forcat paqeruajtëse, Ministrinë e Mbrojtjes dhe agjensi të tjera shtetërore të angazhuara në projekte për mbrojtjen, forcat paraushtararke) si dhe aktivitetet ajrore ushtarake.
Për vitin 2015, programi i shpenzimeve për Ministrinë e Mbrojtjes ishte në nivelin 12.6 miliardë lekë. Ky program zinte vetëm 0.84 % të GDP-së.
Si vend anëtar i NATO-s, Shqipëria ka detyrimin e rritjes reale të shpenzimeve për mbrojtjen, nga viti në vit.
Sipas Spiegel Online, në 2015-ën kishte një ulje me 11% të shpenzimeve për mbrojtjen krahasuar me vitin 2014.
Një nga vendimet dhe konkluzionet e Samitit të Uells-it është që brenda vitit 2020, vendet anëtare të NATO-s duhet të rrisin buxhetin e tyre në nivelin 2% të GDP-së.
Sipas raportit vjetor të NATO-s për vitin 2016, Shqipëria shpenzoi vetëm 1,11% të GDP-së për mbrojtjen. (M.D/ Shuplaka)
Discussion about this post