Deputetja e Partisë Demokratike, Jorida Tabaku, ka ngritur një tjetër shqetësim mbi pabarazinë fiskale dhe trajtimin preferencial që qeveria u bën të lidhurve me pushtetin. Përmes një postimi në rrjetet sociale, Tabaku ka kritikuar ashpër sistemin aktual të taksave, i cili, sipas saj, penalizon qytetarët e ndershëm dhe favorizon oligarkët.
“Një sistem taksash i padrejtë!” – shkruan Tabaku, duke denoncuar faktin që në Shqipëri puna tatohet më shumë se kapitali. Sipas saj, një punëtor, një sipërmarrës i vogël apo një profesionist i lirë paguajnë 23% tatim mbi të ardhurat, ndërkohë që klientët e qeverisë përfitojnë toka falas, përjashtime fiskale dhe favore të personalizuara.
Deputetja demokrate thekson se pabarazia në sistemin ekonomik është rrënjosur thellë, duke e kthyer atë në një mekanizëm që penalizon shumicën dhe shpërblen një grusht të vogël njerëzish pranë qeverisë.
“Në çdo fund muaji, qytetarët paguajnë fatura të shtrenjta për energjinë, ujin dhe karburantin, ndërkohë që oligarkët e qeverisë përfitojnë lehtësira fiskale dhe fitime të garantuara nga koncesionet”, shprehet Tabaku, duke nënvizuar se ky model ekonomik nuk mbështet punën, aftësinë dhe talentin, por favorizon klientelizmin dhe padrejtësinë.
Në përfundim, ajo i bën thirrje qytetarëve shqiptarë të reagojnë dhe të mos pranojnë këtë pabarazi të vazhdueshme. “Më 11 maj, shqiptarët duhet të japin një mesazh të qartë: Mjaft më me këtë pandershmëri! Mjaft më me një ekonomi që punon për pakicën dhe kundër shumicës!”, apelon Tabaku.
Partia Demokratike ka qenë në vijën e parë të denoncimeve kundër politikave fiskale të qeverisë, duke argumentuar se modeli aktual ka thelluar varfërinë dhe ka favorizuar një ekonomi të bazuar në klientelizëm dhe abuzim me fondet publike.
