Deputetja e PD-së Jozefina Topalli kthehet në Shqipëri dhe i bashkohet protestës së opozitës, përballë selisë së Kryeministrisë. Nga e ashtuquajtura “çadra e lirisë”, Topalli shprehet se qeveria po degradon.
“Unë mendoj se ka gjëra më të rëndësishme, duhet konceptuar dhe parë në të ardhmen që të shohim se cilat do të jenë hapat e tjera që do të ndërrmerren. Është e rëndësishme që kjo lëvizje të përhapet në qytetet, të vazhdojë në Tiranë për një qëllim që është vota e lirë e qytetarëve. Sot ndodh që “Hakmarrja për Drejtësi” të flasë për Reformën në Drejtësi. Është një absurd dhe një kallëzim total, atyre duhet t’i përgjigjet shteti për të shpëtuar vendin nga krimin, por shteti është degraduar. Unë besoj se këtë lëvizje po e udhëheqin qytetarët, dhe të gjithë politikanët duhet të ulin kokën përpara tyre.”, tha Topalli.
Ish-kryetarja e Parlamentit shprehet se kryeministri Rama ka frikë, se duhet t’u përgjigjet kërkesave të PD-së.
“Mendoj se ai është më i frikësuari i të gjithëve. Ai duhet t’i përgjigjet opozitës për t’u tërhequr. Të mendosh se pas 26 viteve të kërkosh votën e lirë mbrapsht, ëhstë një turp për të gjithë. Shteti është një degradim, ndërkohë që burgu po kap çdo gjë. Pa folur këtu për premtimet e pambajtuara. Unë mendoj se sinjali i parë ishte ai (protesta), këmbana e fortë që duhet të dëgjojnë me vëmendje.”, shton Topalli.
Topalli ndodhej në Asamblenë Parlamentare të NATO-s në Bruksel, prandaj nuk ishte e pranishme në protestën e djeshme. (D.D/Shuplaka)
