Gjykatën e Landit në Traunstein në Gjermani ka dënuar me 12 vjet burg shoferin shqiptar. Shoferit ju gjend në kamion një sasi prej më shumë se 9 kilogramësh kokainë e fshehur nën sediljen e automjetit. Ky vendim është marrë nga gjykata ditën e hënë, shkruan pnp.de.
Vlera në treg e drogës që i është gjetur shkon nga 1.2 deri në 1.5 milionë euro. I gjykuari ka pranuar se këtë sasi droge e ka marrë në Amsterdam, Holandë, për ta sjellë në Gjermani, transmeton albinfo.ch. Por, ai ka rënë në një kontroll rutinë të policisë rrugore, më 16 korrik në afërsi të Rosenhemit, në autostradën A8 afër kufirit Gjermani-Austri.
Si u kap nga polica:
Pasi patrulla policore e kishte udhëzuar ta linte rrugën, shoferi i kamionit, mbase nën ndikimin e frikës, bën aksident dhe përfundon në mbrojtëset metalike të rrugës.
Gjatë kontrollimit, policëve u ra në sy insistimi i shoferit që, duke mbajtur në dorë një çantë donte të ikte mbrapa një kabine të tualetit. Por ata nuk e lejuan dhe e kthyen në makinë. Pasi ai kishte provuar sërish të ikte drejt autostradës, policët përfundimisht e ndaluan. Gjatë kontrollit të makinës, një qen anti-drogë e gjeti “mallin” në çantën e përmendur më lart. Para trupit gjykues, shqiptari 53-vjeçar fillimisht e ka mohuar veprën por më pas e ka pranuar atë. Dënimi kaq i rëndë i është dhënë veç tjerave edhe për faktin se kjo nuk ishte hera e parë që ai po kapej me drogë. Disa vite më parë atij i ishte gjetur në kamion një sasi prej 457 kilogramësh hashash dhe ishte dënuar me 7 vjet burg nga të cilat i kishte kryer tre vjet.
(J.V/Shuplaka)
Discussion about this post