Julian Deda sulmon këtë të hënë ministrin e Transporteve Sokol Dervishaj duke i kujtuar vendimin që prek shumë shqiptarë: atë të nxjerrjes nga përdorimi të makinave të vjetra.
Aktori i humorit Deda, njëkohësisht edhe koordinator në PD, ironizon me Dervishajn, duke i kujtuar që tani ministri duhet t’jua blejë vetë shqiptarëve makinat, bashkë me partinë e tij, LSI-në.
”Ministria e transporteve paska bërë gati projektligjin për të nxjerrë nga qarkullimi makinat poshtë vitit 2000. Shumë mirë Kolo. Tani filloni mbledhjen e fondeve dhe blija vetë bashkë me partinë tënde nga një makinë njerëzve, se janë të varfër e nuk mund t’i ndërrojnë makinat si ministri kollaret. ”, thotë Deda.
Por sigurisht që Deda nuk mund të qëndrojë pa bërë edhe humor, duke e përmbyllur postimin e tij me një ”Post Scriptum”:
”P.s. Ky ligj hyn në fuqi në Korrik të vitit 2017 dhe mund të zbatohet vetëm nga anëtarët e LSI-së, sepse kanë 8 vjet në pushtet dhe i kanë mundësitë. Urime, integrime.” (V.G/SHUPLAKA)
