Juristi i klubit të Kukësit, Arsen Selmanaj, ka deklaruar dje për “Panorama Sport” se lojtarët që kanë pretendime për t’u larguar nga Kukësi janë me kontrata të rregullta.
“Kontratat e lojtarëve si Koliçi dhe Emini apo kushdo tjetër janë në FSHF. Nga një kopje e kanë edhe ata vetë, por mund t’i shoh apo shqyrtoj kushdo.
Ata janë në kontratë me Kukësin dhe aty nuk ka asnjë filozofi. Për pretendimet që ata kanë, mund të shkojnë kudo, por fakti është që kontratat janë firmosur po nga vetë këta lojtarë. E vetmja gjë që mund të mendojnë lojtarët është t’u japin gaz këmbëve për sezonin e ri me Kukësin.
Çdo gjë është korrekte, nuk ka asgjë për t’u pretenduar, pasi ata i kanë firmosur këto kontrata. Nëse ata nuk i kanë parë apo kuptuar kur kanë firmosur, nuk është çështje për mua. Fakt është se Koliçi dhe Emini janë nën kontratë me klubin e Kukësit dhe letrat janë aty”, deklaroi Selmanaj.
Ndërsa për çështjen e trajnerit Mladen Milinkoviç, juristi i klubit të Kukësit nuk ktheu një përgjigje konkrete. “Nuk di t’ju jap një përgjigje për kontratën e Milinkoviç, sepse nuk jam marrë unë”. Ndërkohë, tashmë mbetet për t’u parë se si do të rrjedhin ngjarjet, teksa Luftëtari ka publikuar kontratën e rinovuar të trajnerit serb.
(B.H/Shuplaka)
Discussion about this post