Djali i ish-ministrit socialist Luan Hajdaraga, Ervin Hajdaraga është përfshirë në dosjen penale të një juristeje 30-vjeçareje të dënuar për mashtrim.
Kjo e fundit, e quajtur Amarilda Leka bënte rolin e sekseres për ulje dënimi ose lirim nga burgu. Ajo kishte mundur të marrë plot 42 500 euro nga të afërmit e të arrestuarve për krime të ndryshme duke përdorur edhe emrin e djalit të ish- ministrit.
Juristja u kishte thënë “viktimave” të saj të mashtrimit se ishte nusja e Ervin Hajdaragës, kjo për t’i bërë më të besueshme lidhjet e saj me prokurorët dhe gjykatësit.
Në një prononcim për gazetën “Panorama”, Ervin Hajdaraga tregon se nuk e njihte fare juristen në fjalë.
“U njoha përmes gazetës me personin që kishte përdorur emrin tim. Ishte sa e hidhur aq dhe qesharake, sepse unë me këtë person nuk e njoh fare, s’kam asnjë lidhje.
Kur e pashë më erdhi për të qeshur, sepse s’mund ta merrja seriozisht. Edhe gjykata nuk e ka marrë seriozisht këtë mashtruese sepse do më kishte thirrur për një verifikim”, shprehet Hajdaraga.
Për Amarilda Lekën prokuroria e Tiranës ka kërkuar dënimin me 2.5 vite burg me akuzën e “Ushtrimit të ndikimit të paligjshëm të personave që kryejnë funksione publike dhe akuzën e kallëzimit të rremë”. (D.D/Shuplaka)
Discussion about this post