Ka patur një fund të çmendur ndeshja e luajtur në Allianz Stadium mes Juventus-it dhe Genoa-s. Bardhezinjtë kanë arritur të fitojnë 2-1, por protagonisti i sfidës ka qenë VAR.
Bonucci ka kaluar në avantazh vendasit në minutën e 36-të, por skuadra e Thiago Motta-s, ish-heroi i Tripelete-s së Inter-it, ka barazuar në të 41-ën me Kouame, goditja me fat e të cilit ka nxjerrë jashtë loje Gigi Buffon-in.
Në minutën e 51-të, miqtë kanë mbetur me dhjetë lojtarë pas kartonit të dytë të verdhë të marrë nga Cassata. Të njëjtin ka patur edhe ylli i Juventus-it, Rabiot, në minutën e 87-të.
Çmenduria ka filluar në minutën e 93-të, me VAR që i ka anuluar një gol Ronaldo-s dhe më i pas ka akorduar një penallti për skuadrën e Sarri-t. Penallti që është transformuar në gol pikërisht nga portugezi, që i ka dhuruar tri pikët Zonjës dhe vendin e parë në renditje.
Në ndeshjet e tjera të luajtura mbrëmjen e sotme në Serinë A, Roma ka marrë një fitore të rëndësishme 4-0 në fushën e Udinese-s me një lojtar më pak. Me të njëjtin rezultat ka fituar edhe Lazio e Thomas Strakoshës, që ka mposhtur pa probleme Torino-n në Olimpico.
Fitojnë edhe Cagliari me Fiorentina-n, që kanë mundur respektivisht Bologna-n dhe Sassuolo-n. Është mbyllur në barazim 1-1 ndeshja mes Sampdoria-s dhe Lecce-s.
Discussion about this post