Kryeministri hungarez Viktor Orban, në një postim në rrjetin social “X”, ka deklaruar se urdhrat ekzekutivë të nënshkruar nga presidenti i SHBA Donald Trump, do të ndryshojnë jo vetëm Amerikën, por edhe botën.
Të hënën, ditën e parë në detyrë, Trump nënshkroi disa urdhra ekzekutivë, duke përfshirë shpalljen e një emergjence kombëtare në kufirin jugor të Shteteve të Bashkuara, tërheqjen nga Organizata Botërore e Shëndetësisë dhe tërheqjen e Uashingtonit nga marrëveshja e Parisit për klimën.
Pavarësisht kundërshtimeve ndaj veprimeve të Trump nga figura të tjera evropiane, Orban, një nga populistët më të shquar të Evropës që shprehu mbështetjen për Trump, shkroi të martën se rebelimi kundër demokracisë liberale ka hyrë në një fazë të re.
“Ka ardhur koha që forcat patriotike të pushtojnë Brukselin”, tha Orban, duke iu referuar selisë së Bashkimit Evropian.
