Kreybashkiaku i vaut të Dejës ka reaguar menjëherë pas kërkesës së Partisë Demokratike për nisjen e verifikimeve, pasi sipas PD-së Babani ka ka fshehur ndalime, denime dhe dëbime nga Italia dhe Maqedonia e Veriut.
Gjithashtu sipas PD-së ai ka mbajtur në mënyrë ilegale disa identitetete të tjera, të cilat nuk i ka deklaruar në formularin e Dekriminalizimit.
Në një prononcim për mediat, Babani është shprehur se “fisi jonë jemi me mbiemrin Babaj, por në shkollë të gjithë kushërinjtë dhe njerëzit e mi e kemi kthyer Babani.”
“Nuk i di pretendimet se jam në punë, por jam i gatshëm të sqaroj çdo gjë. Jam Mark Babani i lindur me 24 dhjetor 1966. Fisi jonë jemi me mbiemrin Babaj, por në shkollë të gjithë kushërinjtë dhe njerëzit e mi e kemi kthyer Babani. Kështu jam regjistruar në klasën e parë. Kam mbaruar shkollën e mesme, kam mbaruar ushtrinë në Tiranë, kam qenë sportist në klubin Vllaznia për tre vjet, si Mark Babani. Kur kam shkuar në Itali me 6 mars të 1991 jam regjistruar Mark Babani i datëlindjes 24 dhjetor 1966. Momentin e parë kur kemi marrë permesot e sonxhornos në Itali, një grup i zonës sonë, në prill-maj të 1991 në Siçili, kam filluar punë në një fabrikë peshku në fund të ’91, shtator-tetor. Kam punuar për tre vjet deri në ’94. Punoja në dy punë, edhe në një hotel. Jam larguar nga Italia në 1995, me fabrikën që punoja kemi bërë një investim në Shëngjin të Lezhës. Kjo pjesë nuk ka lidhje me mua dhe jetën time, më vjen shumë turp që i dëgjoj këto fjalë. Kam luftuar të gjithë jetën time me qenë një shqiptar model. Gjithë jetën unë, babai im dhe gjyshi im nuk i ka bërë kush 24 orë burg.”- u shpreh Babani.
Sipas PD-se: “Në Formularin e Vetëdeklarimit shtetasi Mark Babani ka deklaruar se ka mbajur identitetin e ndryshuar Mark Ndoc Babaj, i datëlindjes 24.12.1966. Ekzistojnë dyshime të arsyeshme sipas indicieve të bëra publike më parë, se ky shtetas, gjithashtu në mënyrë ilegale ka mbajtur edhe disa identitete të tjera, të padeklaruara në Formularin e Dekriminalizimit, si më poshtë:
1. Mark Ndoc Babani, i datëlindjes 24.12.1965
2. Marq Saimir Babaj, i datëlindjes 11.06.1967
3. Ylli Saimir Babaj, i datëlindjes 02.11.1968”.
Në këtë mënyrë Babani bëhet kryebashkiaku i tretë që do të duhet të kalojë në sitën e verifikimit nga ana e prokurorisë pas denoncimeve të bëra nga PD.
Më herët PD ka denoncuar Valdrin Pjetrin, i cili dha dorëheqjen nga kreu i bashkisë së Shkodrës, dhe më pas Agim Kajmakun, që ende është nën hetim nga ana e prokurorisë, dhe nuk dihet ende nëse do ta drejtojë më tej Bashkinë e Vorës.
(M.Q/Faxweb.al)
