“Ka mekanizma PD për t’i bllokuar zgjedhjet?”, ja si është përgjigjur Basha në Washington

Gjatë vizitës së tij zyrtare në Washington, ku kryetari i Partisë Demokratike, Lulzim Basha, u takua me disa zyrtarë të lartë me të cilët diskutoi për zhvillimet më të fundit politike në Shqipëri, ka zhvilluar edhe një intervistë për “Zërin e Amerikës”.

I pyetur ndër të tjera pas këmbënguljes së tij për moszhvillim të zgjedhjeve, nëse Partia Demokratike ka mekanizma për t’i bllokuar zgjedhjet e 18 qershorit, kryedemokrati Basha u përgjigj se do të përdoren të gjitha mekanizmat paqësorë për të mos lejuar një process farsë.

Ai theksoi se këto mekanizma do të bëhen të ditura në varësi të situatës në vend:

“Të gjitha mekanizmat paqësore, por të vendosura për të mos lejuar një proces farsë. Ne këto mekanizma do t’i shpalosim hap pas hapi në varësi të situatës politike në vend. E sigurtë është një gjë dhe ky është një mesazh i qartë që sot e përsëris nga Uashingtoni, zgjedhje me krimin, zgjedhje me drogën, zgjedhje me Edi Ramën kryeministër nuk do të ketë. Ka rëndësi që këtë e them sot nga Uashingtoni pas pothuajse në përfundim të vizitës pasi pas kësaj interviste kam edhe dy takime të tjera.”, është shprehur Basha.

(XH.A/SHUPLAKA)