“Ka myk dhe infeksione nga minjtë”, reperi i famshëm ngre padi ndaj zyrtarëve të burgjeve

Reperi i famshëm, Jay-Z, u ka kërkuar avokatëve të tij që të ndërmarrin veprime juridike ndaj zyrtarëve amerikanë të burgjeve, pasi sipas tij shumë prej të dënuarve përballen me kushte ç’njerëzore.

Kjo kërkesë e Jay-Z ka ardhur në emër të 29 të burgosurve, jeta e të cilëve sipas tij është në rrezik për shkak të anëtarëve të pakët të stafit dhe neglizhencës në burgjet e Misisipit.

CNN shkruan se Jay-Z e nisi aksionin e tij për ngritjen e padive përmes Team Roc, sektori filantropik i perandorisë së tij Roc Nation. Kjo vjen pasi pesë të burgosur u vranë gjatë sulmeve në burgjet e shtetit në një javë gjatë Vitit të Ri në Amerikë.

“Mungesa e financimit gjithashtu i detyron njerëzit në burgjet e Misisipit të jetojnë në mjerim, duke rrezikuar shëndetin e tyre fizik dhe mendor”, thuhet në padi. Në këtë të fundit pretendohet gjithashtu se në burgun në Parchman, ku vdiqën 3 nga 5 viktimat e fundit, ka përmbytje, myk të zi dhe infektim nga minjtë.

Padia kërkon dëmshpërblim për të burgosurit dhe një urdhër që detyron “Mississippi Department of Corrections” të ndërmarrë veprime që ti japin fund kësaj situate.