Ish-peshëngritësi Pirro Dhima i cili zgjodhi që të përfaqësojë Greqinë në peshëngritje dhe që i solli tre medalje të arta, ka folur së fundmi për jetën e tij dhe racizmin në shtetin grek.
Dhima, në një rrëfim për “lifo.gr” thotë se kur ishte në një autobus kishte frikë se mos dikush humbiste portofolin, pasi do fajësohej ai meqë ishte shqiptar. Madje sipas tij ka pasur disa incidente por ai ka pasur fat dhe nuk ka përfunduar keq.
Peshëngritësi shqiptar nga Himara duke folur për racizmin thotë se “Këtu isha shqiptar, në Shqipëri isha grek, diçka e ngatërruar”.
Pirro Dhima shprehet se nëse nuk do të ishte bërë kampion, grekët do ta shihnin me gjysmë syri.
“Racizmi është një fenomen kompleks. Ka të bëjë me kohët, kushtet në të cilat jetojnë çdo shoqëri, si dhe pasurinë dhe varfërinë e njerëzve. Unë kam ardhur në Greqi tridhjetë vjet më parë, kur vendi pati një valë të madhe të emigrantëve të ardhur jo vetëm nga Shqipëria, por nga e gjithë Europe Lindore.
Në një shoqëri të mbyllur si Greqia, ishte e ndjeshme të reagoje. Sigurisht, nuk ishte e mirë, por ishte diçka që nuk mund të shmangnim. Tridhjetë vjet më pas, ka pasur disa hapa përpara, duhet ta pranojmë këtë. Por duhet bërë më shumë. Çdokush me fëmijë e di se shoqëritë po ndryshojnë me brezat që vijnë.
Në disa gjera, më lehtë mund të largohen njerëzit se idetë e tyre. Një 30-vjeçar i sotëm grek nuk ka idetë e prindërve të tij, normale, por kur erdha unë në Greqi ishte ndryshe. Këtu isha shqiptar, në Shqipëri isha grek, diçka e ngatërruar. Ka pasur disa incidente që unë mund t’ju them, por, për fat të mirë, e them, kam qenë me fat.
Të tjerë e kanë pësuar më keq. Dhe e dini çfarë? Çështja nuk është çdo incident, por frika e përhershme që ju fut. Isha në autobus dhe kisha frikë se mos dikush do humbiste portofolin dhe do më fajësonin mua. Unë mendoj se grekët janë racistë ndaj të dobëtëve dhe të varfërve. Unë, nëse nuk do isha bërë kampion, nuk do më pranonin lehtë. Do më shihnin me gjysmë syri’, ka thënë ai.
(B.H/Faxweb)
Discussion about this post