Drejtori ekzekutiv i Qendrës për Mbrojtjen e të Drejtave të Fëmijëve (CRCA), Altin Azizaj thotë se Shqipëria duhet të bëjë më shumë veprime konkrete në fushën e mbrojtjes së të drejtave të njeriut
Ai u shpreh se shoqëria shqiptare duhet të lërë pas “hijet” e së shkuarës mbi pasojat që ka lënë regjimi komunist dhe për këtë duhet t’i japë hapësirë mendimit qytetar, në respekt të të drejtave të cilitdo person,pavarësisht pozitës apo stadit shoqëror ku ai ndodhet.
“Në fund të ditës, çdo përpjekje e jona duhet ta ndryshojë këtë vend, ku çdonjeri duhet të jetojë me dinjitet. Ne si qenie njerëzore, është fakti se edhe në gabime mësojmë. Edhe në një moment sharje, në media apo në parlament, kemi nevojë të kuptojmë se pse e bëjmë këtë? Kemi nevojë edhe të shahemi, jo në sensin e të bërit dëm, por në sensin që njerëzit duhet të mësojmë edhe me mënyrën e gabuar. Njerëzit kanë nevojë të vrasin frikën dhe të mësohen avash avash..”, tha ai në emisionin “Fol Me Mua” në Fax News.
Ai evidentoi një tjetër problem, të cilin e shikon të pasqyruar në mediat shqiptare. Sipas tij, në përmbajtjet e televizioneve shikon shumë pak mendim qytetar, ndërsa pjesën më të madhe thotë ai e zënë politikanët dhe kjo për Hazizajn është disi e ekzagjeruar.
“Nëse ti kërkon të kesh sukses, është e vërtetë që duhet të jesh në respekt të të drejtave të njeriut.Institucionet e kanë për detyrë të gjejnë zgjidhje në konsultim me qytetarët. Askush nuk pyet për të ardhmen e qyteteve tona, sepse të gjitha gjërat bëhen me taksat tona. Ne kemi nevojë të hapim debat, jo të mbyllim debat. Kemi nevojë të hapim hapësirë, jo të mbyllim hapësirë. Po të shikosh televizionet shikon shumë pak debate qytetare”, tha ai.
