Një ditë pas dhunës dhe terrorit të ushtruar nga policia në zonën e Astirit, gazetarja e Fax News Fjona Çela ka qenë sot pranë një familje, shtëpia e të cilëve rrezikon shembjen, ndërsa kryefamiljari Artur Muja, ka marrë dëmtime në këmbë gjatë mëngjesit të djeshëm.
Në një rrëfim për dinamikën e ngjarjeve dje, Muja u shpreh se ndaj të gjithë banorëve është hedhur një sasi mjaft e madhe gazi, çka bëri që ata të përplaseshin me njëri-tjetrin, në tentativë për të shpëtuar.
“Ne po mbrojmë shtëpitë tona, nuk po kërkojmë vëllavrasje. Turma e banorëve u prek nga gazi, disa persona kanë rënë pa ndjenja, kush ishte më i fortë mori në krah të tjerët, më kanë shtyrë nga lartësia.
Njerëzit kanë qenë në panik, plaka dhe pleq të mëdhenj në moshë, ishim duke u ndihmuar. Ka qenë e gjithë zona komplet e mbushur me gazë, kam dëmtime në të dyja thembrat e këmbës, edhe kaviljet, për një javë do bëjmë dhe një grafi tjetër, për momentin i kam në allçi”, u shpreh Muja.
Ajo që është dhe më absurde është fakti se Artur Muja, është ende në process gjyqësor për legalizimin e banesës dhe dyqanit të tij, ndërsa vëllai që është ngjitur me të, dhe i kanë mbyllur dokumentacionet njësoj, ka përfituar dëmshpërblim, pasi i është legalizuar prona.
“Kam dyqane dhe shtëpitë, bashkë me motrën, që sipas projektit të tyre i bie të prishen, pavarësisht se jam ende në process gjyqësor. Vëllait i është legalizuar banesa, mua jo, pavarësisht se ne i kemi plotësuar letrat në të njëjtën ditë. Këta nuk po pyesin më se me letra se pa letra”, tha më tej Muja.
(E.K/Faxweb.al)
Discussion about this post