Vijojnë të shënohen incidente me avionët e linjës “Blue Panorama” duke sjellë një shqetësim të madh për të gjithë pasagjerët shqiptarë. Mëngjesin e sotëm mësohet se avioni që do të udhëtonte nga Rinasi në drejtim të Anconës ka kryer një ulje të detyruar, pak minuta pasi ishte ngritur në fluturim. Pasagjerët të tmerruar kanë treguar minutat e panikut për mediat.
“U ngritëm normalisht, ishim në det, sapo kishim kaluar Durrësin kur pamë tym të dilte nga avioni, kabina u mbush me tym. Ishte tmerr, kishte edhe fëmijë që nisën të qanin”, tregon pasagjeri.
Në ato momente paniku, pasagjeri thotë se nuk janë lejuar të përdorin telefonat për të filmuar dhe se avioni ka bërë disa manovra të rrezikshme para se të ulet.
“Kabina u mbush me tym kur na njoftuan që do ulemi në Rinas për shkak të defektit. Avioni bëri disa lëvizje shumë të rrezikshme, thamë se u rrëzuam. Është i gjithë faji i avionëve të vjetër që sjellin në Shqipëri si të ishim bota e tretë. Pilotët na e shpëtuan jetën, nuk e di se si mundën ta ulnin atë avion në gjendjen që ishte”,- tregon ndër të tjera pasagjeri për ‘’Bw”.
Prej gati dy orësh 50 pasagjerët që prisnin të udhëtonin drejt Anconës janë ende në pritje në Rinas dhe askush nuk i ka lajmëruar se kur do të nisen.
(E.K/FAXWEB.AL)
Discussion about this post