Asambleja Kombëtare e Partisë Socialiste ditën e djeshme, ishte një ngjarje e cila vazhdon të komentohet edhe sot, qoftë për fjalimin e Kryeministrit Edi Rama, ashtu dhe për ndryshimet e bëra në Kabinetin Qeveritar.
I ftuar në FaxNews për të folur rreth kësaj ngjarje politike, ka qenë politologu Endri Tafani.
Në një intervistë për gazetaren Rovena Neziri, Tafani shprehet se nuk kishte ndonjë surprizë nga ndryshimet e bëra, përpos largimit të Ministres së Financave, Delina Ibrahimajt.
Politologu, thotë se Kryeministri vazhdimisht i bën këto përzierje të personazheve në qeverisje për të dhënë idenë e një hovi të ri, megjithatë thekson se Rama nuk e ka ndryshuar mënyrën e qeverisjes.
Hyrjet e reja në Kabinet, sipas Tafanit mund të jenë dhe për një katapultim në PS, për këta persona që nuk është se e kanë ideologjinë e Partisë Socialiste thotë politologu, por thjesht kanë punuar më parë për Ramën.
Endri Tafani: Kabineti i ri qeveritar, nuk është se janë figura që më parë kanë qenë komplet anonimë. Përgjithësisht janë personazhe të njohura dhe bashkëpunëtor të Ramës. Nuk është se ka ndonjë ndryshim me qeverisjen e mëparshme. Rama bën vazhdimisht një përzierje të personazheve në qeverisje, për të dhënë një hov të ri.
Në fund të fundit nuk është se ka për të ndryshuar diçka në mënyrën si ka qeverisur Rama. Logjika në këtë rast është thjesht një marketing. Mënyra se si e ka ndërtuar pushtetin Rama është që të gjithë ministritë janë në dorë të tij. Në këtë rast bie më shumë në sy që asnjë nga figurat aty nuk është figurë tipike socialiste ose të kenë ideologjinë e PS-së. Janë thjesht persona që kanë punuar për Ramën dhe tani po i ngre në një post më lartë. Duket si promovim për t’i kaluar më pas në rangun politik.
Të gjitha lëvizjet e veta, Rama i ka surprizë. Më tepër surprizë është largimi i Ministres së Financave, Ibrahimaj. Po të vësh re qëndrimin e përgjithshëm ndaj saj, duket sikur e kanë respektuar. Vendosja e Metes më duket si një hap mbrapa në kuptimin e asaj që mund të arrihet. Ka qenë pjesë e periudhës së artë të koncesioneve dhe më pas drejtor i AMF-së. Periudha 2013-2017 e implikon në disa gjëra.
Discussion about this post