”Kam komunikuar”, Veliaj i ”ftohtë” në atë ç’ka thotë për Saimir Tahirin

Kreu i Bashkisë së Tiranës, Erion Veliaj ka folur dje edhe për ish-rivalin e tij brenda partisë , Saimir Tahirin.

Fakti është që pas hijeve të skandalit që kanë përfshirë Tahirin në lidhje me aferat e drogës, Veliaj është padyshim disa hapa më para për kreun e Partisë, pas Ramës sigurisht.

Po mbrëmë në emisionin me Sokol Ballën, Veliaj u tregua mjaft i ftohtë në përgjigje duke thënë se shumicën e informacioneve i ka marrë nga media.  

“Unë jam shkëputur nga puna e qeverisë që para dy vjet e gjysmë dhe gjithë kontaktet që kam pasur me deputetët kanë qenë për çështje të zonës, përfshirë edhe Saimirin, për çështje të Kombinatit, për investimet aty dhe kryetarët e bashkive nuk marrin pjesë as në mbledhje të grupit.

Në mbledhje të kryesisë, dy herë mbaj mend kam qenë edhe jashtë me shërbim për takuar kolegë, pra kam qenë komplet i papërfshirë në këto debate dhe diskutime. Kësisoj, edhe disa herë me thënë të drejtën edhe i painformuar.

Një pjesë të madhe të gjërave i kam marrë nga media, por unë besoj që për të gjithë këto gjëra, drejtësia është akoma duke kërkuar të vërtetën dhe besoj që çdo lloj spekulimi me gjëra të paprovuara shton këtë dozën e dyshimit e mosbesimit në Shqipëri, ku ne i kemi gjërat më shumë me “më the, të thashë”, sesa me gjëra të provuara.

Në këtë sens, e kam parë thuajse si çdo qytetar, nga jashtë, pa ndonjë informacion të veçantë nga mbledhjet e partisë apo grupit ku unë s’jam pjesë” – tha Veliaj në një intervistë për “Top Story”.

Pyetjes nëse kishte komunikuar me Tahirin, Veliaj iu përgjigj: “Kam komunikuar. Për një solidaritet njerëzor. Kaq!”

(E.K/FAXWEB)