Banorët e prekur nga tërmeti i 26 Nëntorit ende nuk kanë gjetur një zgjidhje. Dy banore të Rrashbullit treguan për “FaxNew”e ku po jetojnë afro 3 javë pas tërmetit. Që të dyja ato thanë se janë strehuar në një çadër të rregulluar vetë, ndërsa shtuan se nuk kanë marrë asnjë ndihmë nga qeveria.
“Mua më ka rënë shtëpia, banoj në çadër, në çadër me plastmas. Nuk na kanë dhënë asnjë çadër as të bashkisë, askush. Unë kam bërë kërkesën, por sot e kësaj dite nuk ka ardhur njeri. Është shumë e vështirë sepse nuk flihet jashtë. Jam me astmë, kam një qese me ilaçe”, tha një prej banoreve.
Ndërsa banorja tjetër deklaroi se të gjitha sendet në çadër i ka të vetat, ndërsa theksoi se poshtë dyshekut ka shtruar dengjet e kashtës.
“I gjithë tavani ra, kemi bërë kërkesë, por nuk na ka ardhur njeri. I kam nxjerrë të gjitha rrobat jashtë. Kemi marrë dyshekun dhe e kemi vënë në çadër. Nuk na kanë sjellë asgjë. Më kanë dhënë vetëm dy bidona vaj dhe dy batanije ditën e parë. Muri është plasaritur në të dy krahët.
S’ka llamba, mungon energjia elektrike. Që ditën e parë kur ra tërmeti kam dalë jashtë, atje kam sajuar vetë një çadër dhe aty rri. Vajzën bashkë me fëmijën e vogël i fus këtu. Kam marrë dyshekët brenda dhe kam shtruar dengjet e kashtës nën të. Edhe me reshjet e shiut ka qenë shumë e vështirë se frynte edhe erë”, u shpreh banorja tjetër.
(M. I./ Faxweb.al)
Discussion about this post