Jozefina Topalli, Majlinda Bregu dhe Eduard Selami janë padyshim kundërshtarët më të mëdhenj të kryedemokratit Lulzim Basha në PD.
Përherë kritikë ndaj Bashës, ”rebelët” duket se sot morën përgjigjen e parë nga kryedemokrati. Topalli, Bregu dhe Selami janë lënë totalisht jashtë organizimit të protestës së sotme në rrugët e Shqipërisë, që do përbashkallëzohet me bllokim.
Padyshim që emra të tjerë brenda PD-së, si Astrit Patozi kanë qenë mjaft kritikë brenda mbledhjeve të grupit , por me sa duket nuk mendohet të jetë në listën e të penalizuarëve.
Majlinda Bregu, ish-ministre e Integrimit, me një rol kyç në PD, së fundmi duket se ka dhënë mesazhe të forta, në kundërshtim të protestës së çadrës, kur ka publikuar simbolika të rrebeshit që s’e përballon dot një çadër e vogël, fill pas mesazheve të kryetarit të saj së në çadër qytetarët janë shtatëfishuar.
Nga ana tjetër Eduard Selami është parë shumë rrallë në çadër, në mos vetëm një herë, teksa mes demokratësh në protestë ka qarkulluar gjithnjë pyetja: a e ka mbështetur Selami protestën e tyre?
Kurse Jozefina Topalli, një nga figurat më të fuqishme në PD, ka ruajtur një reagim më të kujdesshëm ndaj Bashës, por duke mos e fshehur asnjëherë mosdakordësinë e saj.
Tani, që Lulzim Basha ka rritur profilin e tij si lider i demokratëve, duke u shkëputur nga ”tranzicioni”, siç njihet periudha e kalimit të pushtetit të tij nga Berisha drejt tij, edhe pse ish-kryeministri ka një rol njësoj të fuqishëm, duket se kjo do të jetë një nga lëvizjet e radhës: lënia jashtë nga PD-ja e emrave që gjithnjë e kanë kundërshtuar.
A do të jenë jashtë listës së kandidatëve kur zgjedhjet të organizohen, kjo mbetet për t’u parë, por një gjë është e sigurtë: pikëpyetja rreth tyre do të vazhdojë të ekzistojë. (V.G/SHUPLAKA)
