Pas arrestimit të katër policëve që lejuan kalimin e një kamioni me 8 ton drogë nga Shqipëria drejt Italisë, Prokuroria e ka zgjedhuar rrethin e të dyshuarve. Mësohet se nën hetim përveç policëve janë edhe disa biznesmenë shqiptarë dhe maqedonas si dhe punonjës dogane në pikat e kalimit kufitar të Qafë Thanë dhe portit të Durrësit.
Sipas ABC News, kalimi me lehtësi i 8 tonëve hashash në dy pikat e kontrollit kufitar shqiptar, Qafë Thanë dhe Durrës është bërë në bashkëpunim dhe me dijeni edhe të personave të tjerë.
Kamioni ka hyrë në Shqipëri në datën 04.02.2017 në Pikën Kufitare Qafë Thanë dhe i është nënshtruar një kontrolli sipërfaqësor. Rezulton se shoferi, ka ndaluar në të paktën 2-3 raste në zonën e kontrollit kufitar, ka komunikuar me punonjës policie për pak sekonda dhe më tej është larguar për në brendësi të territorit shqiptar.
“Nga këqyrja e sistemit TIMS, ka rezultuar se ky kamion nuk është i regjistruar nga punojësi i policisë në hyrje të Pikës së Kalimit Kufitar Qafë Thanë. Ndërsa rezulton se është i regjistruar në dalje në Pikën e Kalimit Kufitar të Portit të Durrësit, me datë 05.02.2017, në orën 15:50, tranzit për në Itali.
Nga këqyrja e librit të planizimit të shërbimit ka rezultuar se me datë 04.02.2017 në kohën kur ka hyrë në Shqipëri automjeti kamion, kanë qenë me shërbim në Pikën e Kalimit Kufitar Qafë Thanë Pogradec disa punonjës policie, për të cilët Prokuroria për Krime të Rënda ka kërkuar caktimin e masës së sigurisë “arrest në burg”, e cila është pranuar nga ana e Gjykatës.”, thuhet në njoftimin e sotëm të Prokurorisë.
Punonjësit e policisë që u arrestuan:
-Çlirim Pepa, me detyrë përgjegjës turni
-Ervin Kodra me detyrë kontrollor hyrje dhe dalje
-Lirim Halili me detyrë tek kabina në hyrje
-Syrja Terziu si kontrollor në hyrje. (D.D/Shuplaka)
Discussion about this post