Javë më parë ministri i Drejtësisë Ylli Manjani foli për mundësinë e përdorimit të Forcave të Armatosura në luftën kundër kanabisit.
Sot, i ftuar në “Tonight Ilva Tare”, ai u shpreh se nuk e sheh këtë gjë si një përplasje me ministrin Saimir Tahiri.
“Do ishte marrëzi ta konceptoja kështu. Për fat të keq e kanë lexuar kështu dhe Ministra të kabinetit. Kur isha me pushime në Sarandë, kamarierët nuk ishin më, kishin dalë partizanë në mal. Kur do flas unë, kur nuk jam Ministër? Nuk përkrah kriminalizimin e policisë së shtetit nga PD, e ka gabim. Por kjo situatë, edhe Ministri i Brendshëm e ka pranuar, që ka tejkaluar policinë. Nuk kisha qëllim të nxirrja ushtrinë, se ma ngecën mua. Duhet të ndahemi nga ky fenomen. Nuk e kam kritike me qeverinë, e kam shqetësim politik. Nuk bëj analogji as me Kolumbinë, asnjë vend tjetër. Por them se nëse reagimi shtetëror nuk është i mjaftueshëm. Ishim në mbledhje të Këshillit të Sigurisë dhe një informacion kishte SHISH, një qeveria, nuk u mor vesh asgjë. Unë nuk kuptova gjë ku ishim. Është një fenomen kriminal, po e kriminalizon shoqërinë”, u shpreh Manjani.
Më herët, ministri Manjani kërkoi publikisht përdorimin e ushtrisë në luftën kundër kanabisit.
“Nëse është e nevojshme për të dhënë një efekt reagues proporcional edhe ushtria të dalë nuk ka asgjë. Nga ky fenomen, o ndahemi tani o nuk ndahemi më, ose kur të ndahemi do jetë shumë vonë dhe shumë e dhimbshme dhe kjo është përgjigje që duhet ta japim, e do dalë mënyra, nuk e ka në traditë askush në këtë vend të marrë damka të kësaj natyre. Ky nuk është biznes që siguron mirëqenie, por varfëri, kushdo që merret me këtë punë mbjell varfëri dhe kriminalizon shoqërinë, njësoj si piramidat financiare”, shprehej Manjani, duke nxitur reagimin e eksponentëve të qeverisë dhe PS-së.
Discussion about this post