Kanceri i lëkurës është shtuar ndjeshëm vitet e fundit. 25 raste të reja janë zbuluar për një vit me melanomë, e cila konsiderohet kanceri më vdekjeprurës nga gjithë llojet e kancerit të lëkurës. Mjekët dermatologë japin këshilla për kujdes nga dielli dhe kontroll periodik të nishaneve.
Diagnostikimi i nishaneve është parandalues i melanomës.
“Kur kemi histori familjare, kur shikojmë një nishan që është në ndryshim të vazhdueshëm, kur kemi mbi 50 nishane në trupin tonë patjetër duhet të orientohemi tek dermatologu dhe të bëjmë një ekzaminim të mirë të tyre. Të krijojmë një dosje me të dhënat për nishanet që janë problematik dhe ta rihapim këtë dosje, ta pasurojmë apo ta konsultojmë sikurse do të na thotë dermatologu”, tha mjekja Eriona Shehu për Ora News. Mjekja dermatologe Eriona Shehu thekson rëndësinë e kujdesit nga dielli.
Eriona Shehu: Ruajtja nga dielli, sidomos fëmijët duhet të jetë maksimale. Djegia e lëkurës në mosha të reja presupozon një rritje të probabilitetit për të pasur kancer të të gjitha tipeve në moshat më të rritura.
Maji është muaji i sensibilizimit të llojeve të kancerit të lëkurës, në të cilin këshillohet një vizitë me dermatologët.
